आपले जिल्हे, विकासाची केंद्रे विशेषांक पालकमंत्री सुभाष देशमुख यांना भेट

सांगली, दि. 15, (जि. मा. का.) : माहिती व जनसंपर्क महासंचालनालयाने प्रकाशित केलेल्या लोकराज्य मासिकाच्या आपले जिल्हे, विकासाची केंद्रे हा विशेषांक राज्याचे सहकार, पणन व वस्त्रोद्योग मंत्री तथा सांगली जिल्ह्याचे पालकमंत्री सुभाष देशमुख यांना जिल्हा माहिती अधिकारी यांनी भेट दिला. यावेळी आमदार शिवाजीराव नाईक, आमदार सुधीर गाडगीळ, जिल्हाधिकारी वि. ना. काळम, सांगली मिरज कुपवाड महानगरपालिका आयुक्त रवींद्र खेबुडकर आदि मान्यवर उपस्थित होते.

यावेळी हा विशेषांक राज्यातील सकारात्मक परिवर्तनाचा वेध घेणारा आहे, असे कौतुकोद्गार पालकमंत्री सुभाष देशमुख यांनी व्यक्त केले. तसेच, यावेळी मी मुख्यमंत्री बोलतोय, या कर्जमाफीच्या निर्णयाविषयी माहिती देणारी पुस्तिका भेट देण्यात आली. माहिती महासंचालक ब्रिजेश सिंह यांच्या संकल्पनेतून तसेच, संचालक अजय अंबेकर आणि शिवाजी मानकर यांच्या मार्गदर्शनाखाली, माहिती व जनसंपर्क महासंचालनालयाने मी मुख्यमंत्री बोलतोय, तसेच, डॉ. बाबासाहेब आंबेडकर यांच्या जीवन कार्यावर आधारित महामानव या पुस्तिका तयार केल्या आहेत.

यावेळी जिल्हा माहिती कार्यालयाने तयार केलेल्या आपला जिल्हा या पुस्तिकेचे प्रकाशन मान्यवरांच्या हस्ते करण्यात आले. या पुस्तिकेत सांगली जिल्ह्याचा इतिहास, वैशिष्ट्ये, ओळख, सांस्कृतिक वारसा, नद्या, वन्य विषयक माहिती, महत्त्वाचे सण-उत्सव, पर्यटन व धार्मिक स्थळे, सिंचन, कृषि क्षेत्र, साहित्य, संगीत, चित्रकला, शिल्पकला, शिक्षण, क्रीडा आदिंचा धावता आढावा घेण्यात आला आहे. सांगली जिल्ह्याची समग्र माहिती एकत्रित देण्याचा प्रयत्न या माध्यमातून केला गेला आहे. कोल्हापूर विभागाचे उपसंचालक सतीश लळित यांचे यासाठी मार्गदर्शन लाभले आहे.

00000

महाराष्ट्र वार्षिकी संदर्भ पुस्तकात राज्याच्या समग्र माहितीचे संकलन - पालकमंत्री सुभाष देशमुख

सांगली, दि. 15, (जि. मा. का.) :  माहिती व जनसंपर्क महासंचालनालयाने प्रकाशित केलेले महाराष्ट्र वार्षिकी या संदर्भ पुस्तकात महाराष्ट्राविषयी समग्र माहितीचे संकलन करण्यात आले आहे. या पुस्तकात राज्याचा इतिहास, भूगोल, जनजीवन, परंपरा, जिल्हे व त्यांची वैशिष्ट्ये, शासकीय स्तरावरील महत्त्वाची बाबी अशा विविध स्वरूपातील माहितीचा खजिना या पुस्तकात आहे, असे प्रतिपादन राज्याचे सहकार, पणन व वस्त्रोद्योग मंत्री तथा सांगली जिल्ह्याचे पालकमंत्री सुभाष देशमुख यांनी आज येथे केले.

पालकमंत्री सुभाष देशमुख यांना जिल्हा माहिती अधिकारी संप्रदा बीडकर यांनी महाराष्ट्र वार्षिकी हे पुस्तक भेट दिले, त्या प्रसंगी ते बोलत होते. यावेळी आमदार शिवाजीराव नाईक, आमदार सुधीर गाडगीळ, जिल्हाधिकारी वि. ना. काळम, सांगली मिरज कुपवाड महानगरपालिका आयुक्त रवींद्र खेबुडकर आदि मान्यवर उपस्थित होते.

पालकमंत्री सुभाष देशमुख म्हणाले, महाराष्ट्र वार्षिकी हे पुस्तक ज्ञानात अधिक भर टाकणारे पुस्तक आहे. वस्तुनिष्ठ माहिती असलेले हे पुस्तक अभ्यासक, प्राध्यापक, पत्रकार, राजकीय नेते, स्पर्धा परीक्षांचा अभ्यास करणारे विद्यार्थी तसेच सामान्यज्ञानाची आवड असणाऱ्या सर्व वयोगटातील नागरिकांनाही  अत्यंत उपयुक्त आहे.

माहिती महासंचालक ब्रिजेश सिंह यांच्या संकल्पनेतून संचालक अजय अंबेकर आणि शिवाजी मानकर व टीमने हे पुस्तक संपादित केले आहे..

महाराष्ट्र वार्षिकी 2017 हे पुस्तक सशुल्क जिल्हा माहिती कार्यालय, मध्यवर्ती प्रशासकीय इमारत, विजयनगर, सांगली येथे मिळू शकते. या पुस्तकाची किंमत 300 रूपये इतकी आहे. या पुस्तकामध्ये राज्य शासनाच्या विविध विभागांची सविस्तर माहिती, विभागांचे उद्देश व कार्य, रचना, महत्त्वाच्या योजना, संपर्क क्रमांक व मंत्रीमंडळ निर्णय, महत्त्वाच्या शासकीय घटना, घडामोडी, उपक्रम, महाराष्ट्राची मानचिन्हे, महाराष्ट्रातील भारतरत्न व महाराष्ट्र भूषण पुरस्कार प्राप्त मान्यवर, महाराष्ट्राविषयी अधिकृत वस्तुनिष्ठ माहितीचा समावेश आहे. महाराष्ट्राची भूमी आणि लोक, राज्याची भौतिक वैशिष्ट्ये, भौगोलिक स्थिती, इतिहास, वन्यजीवन, संस्कृती, महाराष्ट्राविषयी सांख्यिकी स्वरूपाच्या बाबी, शिक्षणसंस्था, कृषि उद्योग, पर्यटन स्थळे, सिंचन प्रकल्प आदि माहितीचा समावेश आहे.

    इच्छुकांनी अधिक माहितीसाठी जिल्हा माहिती कार्यालय, सांगली दूरध्वनी क्रमांक 0233-2602059 या क्रमांकावर संपर्क साधावा, असे आवाहन जिल्हा माहिती अधिकारी संप्रदा बीडकर यांनी केले आहे.

00000

महाराष्ट्र मिशन 1 मिलीयन अभियानाच्या माध्यमातून क्रीडा संस्कृतीला चालना - पालकमंत्री सुभाष देशमुख

- जिल्हा क्रीडा संकुलात अभियानाचे जल्लोषात उद्घाटन

- सांगली जिल्ह्यात सर्वाधिक 31 हजार 690 खेळाडुंची नोंदणी

सांगली, दि. 15, (जि. मा. का.) : देशात युवकांची लोकसंख्या जास्त आहे. या युवा भारताची जडणघडण चांगली झाली तरच समृद्ध भारत निर्माण होईल. त्यासाठी योगासने आणि मैदानी खेळ आवश्यक आहेत. महाराष्ट्र मिशन वन मिलीयन या उपक्रमासाठी सांगली जिल्ह्यातून 31 हजार, 690 एवढी राज्यात सर्वाधिक खेळाडुंची नोंदणी झाली आहे. या माध्यमातून क्रीडा संस्कृतीला चालना मिळाली असून, भविष्यात सांगली जिल्ह्यातून चांगले खेळाडू घडतील, असा विश्वास राज्याचे सहकार, पणन व वस्त्रोद्योग मंत्री तथा सांगली जिल्ह्याचे पालकमंत्री सुभाष देशमुख यांनी आज येथे व्यक्त केला.

जिल्हा क्रीडा संकुल येथे फुटबॉल फेस्टीवलच्या उद्घाटन प्रसंगी आयोजित कार्यक्रमात ते बोलत होते. यावेळी आमदार सुधीर गाडगीळ, आमदार सुरेश खाडे, जिल्हाधिकारी वि. ना. काळम, जिल्हा परिषद मुख्य कार्यकारी अधिकारी अभिजीत राऊत, जिल्हा क्रीडा अधिकारी अनिल चोरमले, माध्यमिक शिक्षणाधिकारी महेश चोथे, सांगली जिल्हा फुटबॉल असोसिएशनचे अध्यक्ष जग्गू सय्यद, सहसचिव वसंत अग्रवाल, सचिव आतिश अग्रवाल, राष्ट्रीय खेळाडू विजय ठाणेदार, तौफिक सय्यद आदि मान्यवर उपस्थित होते

महाराष्ट्र मिशन वन मिलीयन या उपक्रमामध्ये सहभागी खेळाडुंना तसेच 17 वर्षाखालील खेळाडुंसाठी फुटबॉल विश्वचषक स्पर्धेच्या संघाला शुभेच्छा देऊन पालकमंत्री सुभाष देशमुख म्हणाले, फेडरेशन ऑफ इंटरनॅशनल फुटबॉल असोसिएशन (फिफा) मार्फत दिनांक 6 ते 28 ऑक्टोबर या कालावधीत भारतामध्ये 17 वर्षाखालील फिफा विश्वचषक स्पर्धा होत आहे. महाराष्ट्राला या स्पर्धेतील सामने खेळविण्याचा बहुमान मिळाला आहे. या पार्श्वभूमिवर राज्यात फुटबॉल खेळाची आवड निर्माण व्हावी, जास्तीत जास्त मुलांनी मैदानी खेळ खेळल्यास त्यांचे आरोग्य सुदृढ होण्यास मदत होईल, या विचाराने राज्य शासनाने फुटबॉल मिशन, वन मिलियन कार्यक्रम जाहीर केला आहे. यामध्ये सांगली जिल्ह्यातील 421 शाळा,  महाविद्यालयांतील 31 हजार 690 एवढ्या विक्रमी खेळाडुंची नोंदणी झाली आहे, याबद्दल त्यांनी गौरवोद्गार काढले.

यावेळी पालकमंत्री सुभाष देशमुख यांनी सर्व सांगली जिल्ह्यातील फुटबॉलप्रेमी खेळाडुंना, संघटनांना, शाळा महाविद्यालयांना शुभेच्छा दिल्या. सहभागी खेळाडुंचे अभिनंदन केले. यावेळी आमदार सुरेश खाडे, आमदार सुधीर गाडगीळ यांनी मार्गदर्शन करून खेळाडुंना शुभेच्छा दिल्या. खेळाडु अन्नपूर्णा सातपुते हिने मनोगत व्यक्त केले.

प्रारंभी मान्यवरांच्या हस्ते क्रीडांगण पूजन करून स्पर्धेचे उद्घाटन करण्यात आले. फुटबॉल संघटना पदाधिकारी व राष्ट्रीय खेळाडु यांचा पालकमंत्री सुभाष देशमुख यांच्या हस्ते सत्कार करण्यात आला.

प्रास्ताविकात जिल्हाधिकारी वि. ना. काळम म्हणाले, फुटबॉल हा खेळ आदिमानवापासून खेळला जात होता. सध्या हा खेळ संपूर्ण जगभरात खेळला जात आहे. सांगली जिल्ह्याचे नाव फुटबॉलच्या माध्यमातून जागतिक पातळीवर चमकावे, यासाठी त्यांनी यावेळी शुभेच्छा दिल्या.

हा उपक्रम यशस्वी करण्यासाठी जिल्हा क्रीडा अधिकारी अनिल चोरमले यांच्या मार्गदर्शनाखाली सुधाकर जमादार, शंकर भास्करे, प्रशांत पवार, अभय चव्हाण, बळवंत बाबर, सीमा पाटील, सुरेश मोटे, गजानन कदम, मंदाकिनी पवार यांनी परिश्रम घेतले. यावेळी सांगली जिल्ह्यातील फुटबॉलप्रेमी, शाळा महाविद्यालय व संघटनांचे खेळाडू उपस्थित होते. सूत्रसंचालन प्रशांत पवार यांनी केले.

00000