सांगली जिल्ह्यात विशेष महसूल लोकअदालतीचे आयोजन प्रलंबित महसुली प्रकरणे तडजोडीने व गतीने मार्गी लावावीत - अपर जिल्हाधिकारी सुशांत खांडेकर

सांगली, दि. 8 (जि. मा. का.) : सांगली जिल्ह्यातील महसूल न्यायालयांमधील प्रलंबित प्रकरणे सामंजस्याने सोडविण्यासाठी जिल्हाधिकारी डॉ. मैनाक घोष यांच्या आदेशान्वये जिल्हा, उपविभाग, तालुका व मंडळ स्तरावर विशेष महसूल लोकअदालतीचे आयोजन करण्यात आले आहे. या अभियानाचा जास्तीत जास्त पक्षकारांनी लाभ घेऊन आपली प्रलंबित महसुली प्रकरणे तडजोडीने व गतीने मार्गी लावावीत, असे आवाहन अपर जिल्हाधिकारी सुशांत खांडेकर यांनी प्रसिध्दीपत्रकाव्दारे केले आहे. महाराष्ट्र शासनाच्या महसूल व वन विभागाच्या दिनांक 13 ऑगस्ट 2026 रोजीच्या शासन निर्णयानुसार महसूल प्रशासनातील अधिकाऱ्यांच्या (Quasi-Judicial) न्यायालयांमध्ये प्रलंबित असलेले महसुली दावे व अपिले पक्षकारांच्या परस्पर संमतीने व तडजोडीने जलदगतीने निकाली काढण्यासाठी दिनांक 1 सप्टेंबर 2026 ते 31 मार्च 2027 या कालावधीत राज्यभर ‘महात्मा ज्योतिराव फुले महसूल लोकअदालत अभियान’ राबविण्यात येत आहे. या अभियानांतर्गत सांगली जिल्ह्यात पुढीलप्रमाणे महसूल लोकअदालत आयोजित करण्यात येणार आहे. दिनांक 30 सप्टेंबर 2026 रोजी अपर जिल्हाधिकारी स्तरावर जिल्हाधिकारी कार्यालय, सांगली येथे लोकअदालत होणार आहे. उपविभागीय कार्यालय – वाळवा/कडेगाव/जत/विटा स्तरावर 28 सप्टेंबर 2026 रोजी संबंधित उपविभागीय कार्यालयात, तर उपविभागीय कार्यालय मिरज अंतर्गत 23 सप्टेंबर 2026 रोजी तहसील कार्यालय कवठेमहांकाळ, 25 सप्टेंबर 2026 रोजी तहसील कार्यालय तासगाव आणि 28 सप्टेंबर 2026 रोजी उपविभागीय कार्यालय मिरज येथे लोकअदालतीचे आयोजन करण्यात आले आहे. तसेच 24 सप्टेंबर 2026 रोजी तहसीलदार/ अपर तहसीलदार स्तरावर संबंधित तहसील / अपर तहसीलदार कार्यालयात आणि 21 सप्टेंबर 2026 रोजी मंडळ अधिकारी स्तरावर संबंधित मंडळ अधिकारी कार्यालयात लोकअदालत होणार आहे. संबंधित नागरिकांनी अधिक माहितीसाठी आपल्या संबंधित उपविभागीय अधिकारी, तहसीलदार किंवा मंडळ अधिकारी कार्यालयाशी संपर्क साधावा, असे आवाहनही अपर जिल्हाधिकारी सुशांत खांडेकर यांनी केले आहे. 00000