कर्जमुक्तीच्या चौथ्या टप्प्यात सांगली जिल्ह्यातील शेतकऱ्यांना ५५ कोटी ४८ लाखांचा लाभ

- ४ नोव्हेंबर रोजी जिल्हा मध्यवर्ती व राष्ट्रीयीकृत बँकांमार्फत रक्कम वितरित सांगली, दि. 8 (जि. मा. का.) : राज्य शासनाच्या पुण्यश्लोक अहिल्यादेवी होळकर शेतकरी कर्जमुक्ती योजना २०२६ अंतर्गत सांगली जिल्ह्यातील शेतकऱ्यांना कर्जमुक्तीचा लाभ देण्याची प्रक्रिया सुरू आहे. या योजनेच्या चौथ्या टप्प्यात ४ नोव्हेंबर रोजी जिल्ह्यातील शेतकऱ्यांच्या कर्जखात्यांवर ५५ कोटी ४८ लाख रुपयांची रक्कम वितरित करण्यात आली आहे. जिल्हा मध्यवर्ती सहकारी बँकेमार्फत ४५ कोटी ३८ लाख, तर राष्ट्रीयीकृत बँकांमार्फत १० कोटी १० लाख रुपयांचा लाभ देण्यात आला. योजनेची चौथी यादी २३ ऑक्टोबर २०२६ रोजी प्रसिद्ध करण्यात आली. या यादीत जिल्हा मध्यवर्ती सहकारी बँकेचे ८ हजार ३१८ आणि राष्ट्रीयीकृत बँकांचे १६६ अशा एकूण ८ हजार ४८४ शेतकऱ्यांचा समावेश आहे. या टप्प्यातील वितरणामध्ये जिल्हा मध्यवर्ती सहकारी बँकेच्या ७ हजार ३६७ आणि राष्ट्रीयीकृत बँकांच्या ९११ शेतकऱ्यांना लाभ देण्यात आल्याची आकडेवारी उपलब्ध आहे. यापूर्वीच्या तीन याद्यांमधूनही जिल्ह्यातील पात्र शेतकऱ्यांना कर्जमुक्तीचा लाभ देण्यात आला आहे. पहिल्या यादीतून १५६ कोटी ५४ लाख, दुसऱ्या यादीतून ६७ कोटी २५ लाख, तर तिसऱ्या यादीतून १५ कोटी ४६ लाख रुपयांचे वितरण करण्यात आले आहे. अशा प्रकारे चारही टप्प्यांतील वितरणाचा विचार करता सांगली जिल्ह्यातील शेतकऱ्यांना आतापर्यंत एकूण २९४ कोटी ७३ लाख रुपयांचा कर्जमुक्तीचा लाभ वितरित करण्यात आला आहे. या योजनेमुळे कर्जाच्या ओझ्याखाली असलेल्या शेतकऱ्यांना आर्थिक दिलासा मिळत आहे. 00000

सांगली जिल्ह्यातील २ लाख ६ हजार ६०० शेतकऱ्यांना १०३ कोटी ३० लाखांची दिवाळी अग्रीम मदत

- राज्यातील दुष्काळग्रस्त शेतकऱ्यांसाठी शासनाचा आर्थिक आधार; पात्र शेतकऱ्यांच्या खात्यात प्रत्येकी पाच हजार रुपये जमा सांगली, दि. 7 (जि. मा. का.) : राज्यातील दुष्काळग्रस्त ३०४ तालुक्यांतील पात्र शेतकऱ्यांना दिवाळीपूर्वी आर्थिक दिलासा देण्यासाठी शासनाने जाहीर केलेल्या दिवाळी अग्रीम मदतीअंतर्गत सांगली जिल्ह्यातील २ लाख ६ हजार ६०० शेतकऱ्यांच्या बँक खात्यांवर १०३ कोटी ३० लाख रुपयांची रक्कम जमा करण्यात आली आहे. राज्य शासनाकडून पात्र शेतकऱ्यांना प्रत्येकी पाच हजार रुपये अग्रीम मदत देण्यात येत असून, या मदतीमुळे दुष्काळी परिस्थितीत शेतकऱ्यांना आर्थिक आधार मिळाला आहे. राज्यातील दुष्काळी परिस्थिती लक्षात घेऊन शेतकऱ्यांना सणासुदीच्या काळात आर्थिक मदत मिळावी, यासाठी मुख्यमंत्री देवेंद्र फडणवीस यांनी दिवाळीपूर्वी प्रत्येकी पाच हजार रुपये अग्रीम मदत देण्याची ग्वाही दिली होती. त्यानुसार महसूल, मदत व पुनर्वसन आणि कृषी विभागाच्या यंत्रणेमार्फत मदत वितरणाची कार्यवाही करण्यात आली. शेतकऱ्यांना शेतीच्या हंगामातील अडचणी, पीक नुकसानीमुळे निर्माण झालेली आर्थिक परिस्थिती आणि सणासुदीचा खर्च यांचा सामना करताना या अग्रीम मदतीचा उपयोग होणार आहे. याबाबत आटपाडी तालुक्यातील खरसुंडीचे अवधूत देशपांडे म्हणाले, महाराष्ट्र शासनातर्फे शेतकऱ्यांना जो दुष्काळ निवारण निधी देण्यात येणार होता, तो निधी माझ्या अकाउंटमध्ये २ नोव्हेंबर रोजी जमा झालेला आहे. आणि महाराष्ट्र शासनाचे मी याकरिता आभारी आहे. शेतकऱ्यांकरिता दीपावलीच्या आधी जो निधी देण्यात येणार होता, तो निधी महाराष्ट्र शासनाने अकाउंटमध्ये जमा केलेला आहे, तरी महाराष्ट्र शासनाचे मी आभारी आहे. तसेच आटपाडी तालुक्यातील महसूल विभागातर्फे वेळोवेळी शेतकऱ्यांकरिता प्राधान्य देऊन निधी जमा करण्यात आलेला आहे., त्यासाठी त्यांनी शासनाचे आभार मानले. मिरज तालुक्यातील सांगली येथील प्रदीप पाटील म्हणाले, खरीप हंगाम 2026 मध्ये सोयाबीनचे मी पीक घेतले होते. दुष्काळामुळे माझ्या उत्पन्नाला घट आली आणि त्या नुकसानीचे पंचनामे होऊन माझ्या बँक खात्यावर 5 हजार रुपये अग्रिम स्वरूपात जमा झाले आहेत. त्यासाठी त्यांनी शासनाचे आभार मानले. तासगाव तालुक्यातील लोकरेवाडी येथील बाळकृष्ण बाबर म्हणाले, शेती पीकाचे नुकसानीचे पंचनामे शासनाने तात्काळ करून अग्रिम म्हणून ५ हजार रुपये माझ्या खात्यात जमा झाले आहेत. त्यासाठी त्यांनी शासनाचे आभार मानले. ज्या पात्र शेतकऱ्यांच्या खात्यात तांत्रिक अडचणी किंवा बँक खात्याच्या तपशिलातील त्रुटींमुळे मदतीची रक्कम जमा झालेली नाही, अशा शेतकऱ्यांच्या अडचणी दूर करून त्यांनाही मदत देण्याची प्रक्रिया सुरू आहे. दुष्काळग्रस्त एकही पात्र शेतकरी मदतीपासून वंचित राहू नये, यासाठी शासनाकडून प्रयत्न करण्यात येत असून, तांत्रिक अडचणी दूर झाल्यानंतर उर्वरित पात्र शेतकऱ्यांनाही अग्रीम मदतीचा लाभ मिळणार आहे. ०००००

डीपीसीतून पोलीस दलासाठी प्राप्त 27 वाहनांचे पालकमंत्री चंद्रकांत पाटील यांच्या हस्ते लोकार्पण

सांगली, दि. 6 (जि. मा. का.) : जिल्हा वार्षिक योजनेतून पोलीस दलास प्राप्त २७ वाहनांचे लोकार्पण राज्याचे उच्च व तंत्र शिक्षण, संसदीय कार्य मंत्री तथा जिल्ह्याचे पालकमंत्री चंद्रकांत पाटील यांच्या हस्ते आज करण्यात आले. जिल्हा पोलीस मुख्यालय येथे आयोजित या कार्यक्रमास खासदार विशाल पाटील, आमदार सुधीर गाडगीळ, जिल्हाधिकारी डॉ. मैनाक घोष, पोलीस अधीक्षक तुषार दोशी, जिल्हा परिषद मुख्य कार्यकारी अधिकारी विशाल नरवाडे, पालकमंत्री महोदय यांचे विशेष कार्य अधिकारी बाळासाहेब यादव आदिंसह पोलीस विभागातील वरिष्ठ अधिकारी व कर्मचारी उपस्थित होते. यावेळी पालकमंत्री चंद्रकांत पाटील म्हणाले, जिल्हा वार्षिक योजनेतून पोलीस दलासाठी वाहने, अधिकाऱ्यांसाठी निवासस्थाने, पोलीस ठाण्यांसाठी इमारती अशा विविध माध्यमातून पोलीस दलाला बळकटीकरण करण्यात येत आहे. अशा उपाययोजनांतून गुन्हेगारांवर वचक बसून कायदा व सुव्यवस्था हाताळण्यासाठी मदत होणार आहे, असे ते म्हणाले. जिल्हा वार्षिक योजने योजनेतून पोलीस दलाचे आधुनिकीकरण करणे, वाहतूक व्यवस्थेचे बळकटीकरण करणे, अंतर्गत ही वाहने उपलब्ध करून देण्यात आली आहेत. सन २०२६-२७ च्या जिल्हा नियोजन समितीच्या निधीमधून 3,19,62,543/- रूपये इतक्या किमतीची एकूण २७ वाहने खरेदी करण्यात आलेली आहेत. त्यामध्ये एक्सयुव्ही ७ एक्सओ - ०२, स्कॉर्पिओ - ०५, बोलेरो - १४, ट्रॅक्स तुफान - ०५, आयशर ट्रक - ०१ अशी वाहने मा. पोलीस महासंचालक कार्यालय महाराष्ट्र राज्य, मुंबई यांचेकडून सांगली जिल्हा पोलीस दलास प्राप्त झालेली आहेत. सदर वाहनांचा आपत्कालिन परिस्थितीमध्ये नागरिकांना मदत करण्यास उपयोग होणार असून पोलीस दलास कायदा व सुव्यवस्था तसेच सर्व सामान्य नागरिकांची सुरक्षा इत्यादी करिता प्रभावीपणे कामगिरी करण्यात या वाहनांची भूमिका महत्वपूर्ण ठरणार आहे. 00000

पोस्टाच्या माध्यमातून हयातीचा दाखला घरबसल्या देणे शक्य

सांगली दि. 6 (जि.मा.का.) : नोव्हेंबर महिन्यात सर्व सेवानिवृत्त कर्मचाऱ्यांना बँकेत जाऊन हयातीचा दाखला सादर करावा लागतो. यासाठी बँकांमध्ये लांब रांगा लागत असल्याने तसेच तासनतास प्रतीक्षा करावी लागत असल्याने निवृत्त कर्मचाऱ्यांना त्रास सहन करावा लागतो. मात्र, आता सेवानिवृत्त कर्मचाऱ्यांना पोस्टमनला घरी बोलावून किंवा पोस्ट कार्यालयात जाऊन ऑनलाइन पद्धतीने हयातीचा दाखला देता येणार आहे. यासाठी केंद्राच्या पोस्ट पेमेंट बँक आणि पेन्शन विभागाच्या माध्यमातून ही योजना आणण्यात आली असल्याचे सांगली विभागाचे प्रवर अधीक्षक डाकघर अर्जुन इंगळे यांनी प्रसिध्दीपत्रकाव्दारे कळविले आहे. दरवर्षी नोव्हेंबर महिन्यात सर्व सेवानिवृत्त कर्मचाऱ्यांना त्यांच्या हयातीचा दाखला संबंधित बँकेच्या माध्यमातून निवृत्त वेतन घेणाऱ्या लाभार्थ्यांना सादर करावा लागतो. यावेळी अनेक निवृत्तीधारकांचे बायोमेट्रिक होत नाही. कारण त्यांच्या बोटांचे ठसे नीट उमटत नाहीत. त्यामुळे त्यांना अडचणींचा सामना करावा लागतो. पोस्टाच्या या योजनेत फेस ऑथेंटिकेशन करून हयातीचा दाखला देता येणार आहे. जिल्ह्यातील सर्व पेन्शनधारकांना हयातीचा दाखला देणे सुलभ होण्यासाठी पोस्ट विभागाकडून सर्व कार्यालयांमध्ये ही सेवा उपलब्ध करून देण्यात आली आहे. जिल्ह्यातील पेन्शनधारकांनी या योजनेचा जास्तीत जास्त लाभ घ्यावा, असे आवाहन प्रसिध्दीपत्रकाव्दारे करण्यात आले आहे. 00000

नागरिकांना दर्जेदार आरोग्य सुविधा उपलब्ध करून देण्यासाठी आरोग्यविषयक योजनांची प्रभावी अंमलबजावणी करा - पालकमंत्री चंद्रकांत पाटील

- जिल्हास्तरीय एकात्मिक आरोग्यवर्धिनी समितीची बैठक संपन्न सांगली दि. 6 (जि.मा.का.) : जिल्ह्यातील आरोग्य सेवांचा दर्जा उंचावण्यासाठी आरोग्य यंत्रणा अधिक सक्षम करणे, नागरिकांना दर्जेदार आरोग्य सुविधा उपलब्ध करून देण्यासाठी आरोग्यविषयक योजनांची प्रभावी अंमलबजावणी करावी, असे निर्देश राज्याचे उच्च व तंत्र शिक्षण, संसदीय कार्य मंत्री तथा जिल्ह्याचे पालकमंत्री चंद्रकांत पाटील यांनी आज येथे दिले. जिल्हाधिकारी कार्यालयातील जिल्हा नियोजन समिती सभागृहत जिल्हास्तरीय एकात्मिक आरोग्यवर्धिनी समितीची बैठक पालकमंत्री चंद्रकांत पाटील यांच्या अध्यक्षतेखाली संपन्न झाली. त्यावेळी ते बोलत होते. बैठकीस खासदार विशाल पाटील, आमदार सर्वश्री सदाभाऊ खोत, डॉ. सुरेश खाडे, सुधीर गाडगीळ, सत्यजित देशमुख, जिल्हा परिषद अध्यक्ष संगीता पाटील, जिल्हाधिकारी डॉ. मैनाक घोष, महापालिका आयुक्त संजीता महापात्र, जिल्हा परिषदेचे मुख्य कार्यकारी अधिकारी विशाल नरवाडे, जिल्हा शल्य चिकित्सक डॉ. विक्रमसिंह कदम, जिल्हा आरोग्‍य अधिकारी डॉ. विजयकुमार वाघ, मा. पालकमंत्री महोदयांचे विशेष कार्यकारी अधिकारी बाळासाहेब यादव तसेच आटपाडी पंचायत समितीचे सभापती दत्तात्र्ये पाटील, कडेगाव पंचायत समितीचे सभापती डॉ. जितेश कदम, तासगाव पंचायत समिती सभापती अरूणा पाटील, कवठेमहांकाळ पंचायत समिती सभापती सिंधुताई पाटील, वाळवा पंचायत समिती सभापती उदयसिंह पाटील यांच्यासह आरोग्य विभागाचे अधिकारी उपस्थित होते. पालकमंत्री चंद्रकांत पाटील म्हणाले, आयुष्यमान भारत योजनेंतर्गत जास्तीत जास्त रूग्ण शासकीय रूग्णालयात उपचारासाठी कसे येतील ते पहावे. या माध्यमातून उपचाराचा परताव्याचा केंद्र व राज्य शासनाचा निधी मिळवण्यासाठी प्रयत्न करावेत, जेणेकरून सदरचा निधी त्या त्या रूग्णालयाच्या आरोग्य सुविधा अधिक बळकट करण्यासाठी वापरता येईल. आरोग्य विभागाकडील रिक्त पदावर कंत्राटी पध्दतीने नियुक्ती करण्याचे अधिकार जिल्हाधिकारी यांना आहेत. त्याप्रमाणे ते कार्यवाही करीत आहेत. आरोग्य यंत्रणेने त्यांच्याकडील टेस्टींग लॅब अधिक बळकट कराव्यात, प्रशिक्षीत कर्मचारी नेमून अचूक निदान होईल यासाठी प्रयत्न करावेत. यासाठी वेळोवेळी आढावा घेण्याच्या सूचना पालकमंत्री चंद्रकांत पाटील यांनी यावेळी दिल्या. त्याचबरोबर बैठकीत मान्यवरांनी उपस्थित केलेल्या प्रश्नांवर आवश्यक कार्यवाही करण्यात येईल, असे त्यांनी यावेळी सांगितले. यावेळी खासदार विशाल पाटील, आमदार सदाभाऊ खोत, आमदार डॉ. सुरेश खाडे, आमदार सुधीर गाडगीळ, आमदार सत्यजित देशमुख यांच्यासह पंचायत समितीचे सभापती यांनी आरोग्य सुविधा अधिक बळकट करण्यासाठी विविध सूचना मांडल्या. ईश्वरपूर येथील शासकीय रूग्णालयात ट्रॉमा सेंटर व सिटी स्कॅन मशिन सुविधा उपलब्ध करून देण्याची मागणीही आमदार सत्यजित देशमुख यांनी केली. त्याचबरोबर आरोग्य संस्थामध्ये निदान लॅब, स्वच्छता, प्राथमिक आरोग्य केंद्राच्या ठिकाणी सुरक्षा रक्षक आदी सूचना मान्यवरांनी मांडल्या. प्रास्ताविकात जिल्हा शल्य चिकित्सक डॉ. विक्रमसिंह कदम यांनी तालुका, महानगरपालिका व जिल्हास्तरावरील समितीची रचना, कार्ये याबाबाबत सविस्तर सादरीकरण केले. तसेच आरोग्य व्यवस्था बळकटीकरणासाठी आत्तापर्यंत करण्यात आलेली कार्यवाही व पुढील नियोजनाबाबत सविस्तर माहिती दिली. 00000

दुष्काळावर मात करण्यासाठी सर्व यंत्रणांनी संवेदनशीलतेने, समन्वयाने जबाबदारी पार पाडावी - पालकमंत्री चंद्रकांत पाटील

- जिल्ह्यातील दुष्काळी परिस्थिती व उपाययोजनांचा घेतला आढावा सांगली, दि. 6 (जि. मा. का.) : दुष्काळी परिस्थितीवर मात करण्यासाठी सर्व यंत्रणांनी संवेदनशीलतेने व समन्वयाने काम करावे. पाणी उपलब्धता, जलसंधारण, पाणीपुरवठा आणि ग्रामीण भागातील मूलभूत सुविधांना प्राधान्य द्यावे. मंजूर कामांच्या अंमलबजावणीतील अडचणी वेळेत दूर करून कामे रखडणार नाहीत, याची दक्षता घ्यावी, अशा सूचना राज्याचे उच्च व तंत्र शिक्षण, संसदीय कार्य मंत्री तथा जिल्ह्याचे पालकमंत्री चंद्रकांत पाटील यांनी आज येथे दिल्या. अल निनो व दुष्काळी स्थितीच्या पार्श्वभूमिवर आयोजित आढावा बैठकीच्या अध्यक्षस्थानावरून ते बोलत होते. जिल्हाधिकारी कार्यालयातील बैठक कक्षात आयोजित या बैठकीस जिल्हा परिषद अध्यक्ष संगिता पाटील, आमदार सत्यजीत देशमुख, जिल्हाधिकारी डॉ. मैनाक घोष, जिल्हा परिषद मुख्य कार्यकारी अधिकारी विशाल नरवाडे, जिल्हा परिषद उपाध्यक्ष ऋषिकेश लाड, महिला व बालकल्याण सभापती स्नेहल मोरे, समाजकल्याण सभापती दादासाहेब कोळेकर, बांधकाम व अर्थ सभापती पृथ्वीराज पाटील, कृषि व पशुसंवर्धन सभापती सावित्री रवी पाटील, अप्पर जिल्हाधिकारी सुशांत खांडेकर, निवासी उपजिल्हाधिकारी डॉ. स्नेहल कनिचे आदिंसह संबंधित यंत्रणांचे प्रमुख उपस्थित होते. पालकमंत्री चंद्रकांत पाटील म्हणाले, राज्य शासनाच्या दुष्काळी तालुक्यात सांगली जिल्ह्यातील सर्व तालुक्यांचा समावेश आहे. शासनाने पाच हजार रुपयांची अग्रीम मदत देऊन शेतकरी बांधवांना दिलासा दिला आहे. तसेच, अहिल्यादेवी होळकर शेतकरी कर्जमुक्ती योजनेची चौथी यादीही जाहीर झाली असून, रक्कम वितरण सुरू झाले आहे. राज्य शासनाबरोबरच सर्व शासकीय यंत्रणांनी शेतकऱ्यांच्या पाठीशी खंबीरपणे उभे राहून त्यांना सर्वतोपरी मदत करावी, असे आवाहन त्यांनी केले. दुष्काळी परिस्थितीत पशुधनासाठी चारा, नागरिकांसाठी पिण्याचे पाणी आणि शिल्लक पाण्याचे सिंचनासाठी नियोजन करावे, असे सूचित करून पालकमंत्री चंद्रकांत पाटील म्हणाले, संबंधित शासकीय यंत्रणांनी परस्पर समन्वयातून काम करून शेतकऱ्यांना शासनाच्या विविध सवलतींचा लाभ सुलभतेने मिळवून द्यावा. दुष्काळग्रस्त तालुक्यांमध्ये कोणत्याही प्रकारची सक्तीची वसुली करण्यात येऊ नये. राज्य शासनाकडून देण्यात येणारी आर्थिक मदत, सवलती आणि योजनांचा लाभ पात्र शेतकऱ्यांपर्यंत तत्परतेने पोहोचवावा, असे त्यांनी सांगितले. पालकमंत्री चंद्रकांत पाटील म्हणाले, संभाव्य चारा टंचाई टाळण्यासाठी पशुसंवर्धन आणि कृषी विभागाने आतापासूनच नियोजन करावे. शेतकऱ्यांना चारा लागवड आणि चारा उत्पादनासाठी प्रोत्साहित करावे. जिल्ह्यातील पशुधनासाठी पुरेशा प्रमाणात चारा उपलब्ध राहील, यासाठी आवश्यक उपाययोजना कराव्यात. संभाव्य पाणीटंचाईचा सामना करण्यासाठी उपलब्ध जलसाठ्याचे योग्य व्यवस्थापन करावे. पाण्याचा काटकसरीने वापर करण्याबाबत जनजागृती करावी, असे ते म्हणाले. शासकीय योजनांच्या अंमलबजावणीव्यतिरीक्त अधिकाऱ्यांनी दुष्काळी परिस्थितीवर मात करण्यासाठी प्रयोग करावेत. टँकरच्या माध्यमातून पाणी पुरवठा होत आहे. मात्र, संबंधित गावाने पुढाकार घेऊन पाण्याची टाकी बांधल्यास सी एस आर च्या माध्यमातून टँकरने पाणी पुरवठा करता येईल. तसेच, हे पाणी शुद्ध होण्यासाठी पाणी शुद्धीकरण मोबाईल व्हॅन उपलब्ध करून देण्याचा विचार यावेळी पालकमंत्री चंद्रकांत पाटील यांनी व्यक्त केला. तसेच, आपल्यामार्फत सुरू असलेल्या उपक्रमातून दुष्काळी भागात धान्यवाटप करणाऱ्या दुकानदारांना 50 टक्के सवलतीच्या दरात धान्य उपलब्ध करून देऊ, असे त्यांनी सांगितले. जिल्हाधिकारी डॉ. मैनाक घोष म्हणाले, पाणी उपलब्ध असलेल्या ठिकाणी महिला बचत गटांना चारा उत्पादनासाठी शासकीय जमीन उपलब्ध करून देण्यात येईल, यासाठी नियोजन करण्यात येत आहे. हा उत्पादित करण्यात आलेला चारा शासनाकडून खरेदी केला जाईल, असे त्यांनी सांगितले. यावेळी पाटबंधारे, जिल्हा परिषद पाणीपुरवठा, मृद व जलसंधारण, कृषि, पशुसंवर्धन, भूजल, लघुपाटबंधारे विभाग, महावितरण, रोजगार हमी योजना आदि संबंधित विभागांनी दुष्काळावर मात करण्यासाठी करण्यात येत उपाययोजनांची सविस्तर माहिती सादर केली. 00000

जिल्हा वार्षिक योजनेच्या कामांना 30 नोव्हेंबरपूर्वी प्रशासकीय मान्यता घ्या - पालकमंत्री चंद्रकांत पाटील

- जिल्हा वार्षिक योजनांतर्गत राज्यस्तरीय यंत्रणांचा घेतला आढावा - प्राप्त निधी वेळेत खर्च करण्याचे निर्देश सांगली, दि. 6 (जि. मा. का.) : जिल्हा वार्षिक योजना सन 2025-26 अंतर्गत सांगली जिल्ह्यात पायाभूत सुविधा, वीज वितरण व्यवस्था, सौर ऊर्जा, जलसंधारण, क्रीडा सुविधा, आरोग्य सेवा, वनसंवर्धन, महिला व बालविकास तसेच शासकीय इमारतींच्या दुरुस्ती व बांधकामांची विविध कामे हाती घेण्यात आली. या योजनांमधून जिल्ह्यातील विविध विभागांमार्फत विकासकामे राबविण्यात येत असून अनेक कामे पूर्ण झाली आहेत, तर काही कामे प्रगतिपथावर आहेत. यातील प्रलंबित कामे विहित कालमर्यादेत पूर्ण करावीत. तसेच, चालू आर्थिक वर्षातील प्रशासकीय मान्यतेची कार्यवाही 30 नोव्हेंबरपर्यंत पूर्ण करावी, अशा सूचना राज्याचे उच्च व तंत्र शिक्षण, संसदीय कार्य मंत्री तथा जिल्ह्याचे पालकमंत्री चंद्रकांत पाटील यांनी आज येथे दिल्या. जिल्हा वार्षिक योजनेच्या आढावा बैठकीच्या अध्यक्षस्थानावरून ते बोलत होते. जिल्हाधिकारी कार्यालयातील बैठक कक्षात आयोजित या बैठकीस जिल्हाधिकारी डॉ. मैनाक घोष, उपवनसंरक्षक सागर गवते, जिल्हा नियोजन अधिकारी अशोक पाटील, सहायक आयुक्त समाजकल्याण बाबासाहेब कामत, पालकमंत्री महोदय यांचे विशेष कार्य अधिकारी बाळासाहेब यादव यांच्यासह राज्यस्तरीय यंत्रणांचे सर्व विभागप्रमुख उपस्थित होते. पालकमंत्री चंद्रकांत पाटील म्हणाले, जिल्हा वार्षिक योजनेच्या निधीतून नागरिकांना अपेक्षित विकासकामे प्रत्यक्षात पूर्ण होणे महत्त्वाचे आहे. त्यामुळे प्रत्येक विभागाने कामनिहाय तांत्रिक मान्यता, प्रशासकीय मान्यता, निविदा प्रक्रिया आणि कार्यारंभ आदेश याबाबत सूक्ष्म नियोजन करून त्याची अंमलबजावणी करावी. मंजूर कामांच्या अंमलबजावणीतील अडचणी वेळेत दूर करून कामे रखडणार नाहीत, याची दक्षता घ्यावी. प्रशासकीय मान्यता, निविदा आणि कार्यारंभ आदेश या प्रक्रियांमध्ये अनावश्यक विलंब होऊ देऊ नये, असे त्यांनी सूचित केले. पालकमंत्री चंद्रकांत पाटील म्हणाले, जिल्हा वार्षिक योजनेतील सर्वसाधारण व अनुसूचित जाती उपयोजनेच्या निधीतून अपेक्षित विकास साधण्यासाठी सर्व यंत्रणांनी परस्पर समन्वयाने काम करावे. निधी उपलब्ध असूनही कामे प्रलंबित राहणार नाहीत, याची दक्षता घ्यावी. कामांच्या अंमलबजावणीदरम्यान गुणवत्ता नियंत्रणाला प्राधान्य द्यावे. पूर्ण झालेल्या कामांची आवश्यक देयके व अंतिम कार्यवाही वेळेत करावी. चालू आर्थिक वर्षातील कामांना 30 नोव्हेंबरपूर्वी प्रशासकीय मान्यता देऊन प्रत्यक्ष कामांना गती द्यावी, असे निर्देश पालकमंत्री चंद्रकांत पाटील यांनी यावेळी दिले. यावेळी पालकमंत्री श्री. पाटील यांनी जिल्हा वार्षिक योजना सर्वसाधारण व अनुसूचित जाती उपयोजना अंतर्गत मंजूर नियतव्यय, प्रत्यक्ष निधीची तरतूद, प्राप्त निधी, झालेला खर्च, कामांची सद्यस्थिती, गत आर्थिक वर्षातील प्रलंबित कामे, चालू आर्थिक वर्षातील कामांना प्रशासकीय मान्यता, निविदा प्रक्रिया आणि कार्यारंभ आदेश यांचा सविस्तर आढावा घेतला. संबंधित विभागप्रमुखांनी आतापर्यंत केलेल्या कार्यवाहीची माहिती दिली. 00000