अंधश्रद्धांना बळी न पडता वैज्ञानिक दृष्टिकोनातून विचार करा अंधश्रद्धा निर्मूलन कार्यक्रमात वाघेश साळुंखे यांचे विद्यार्थ्यांना मार्गदर्शन

सांगली, दि. 5 (जि. मा. का.) : सेवा संकल्प अभियान’ अंतर्गत विटा येथे अंधश्रद्धा निर्मूलन कार्यक्रमाचे आयोजन करण्यात आले. डॉ. बाबासाहेब आंबेडकर मुलींचे शासकीय वसतिगृह, मुलांचे शासकीय वसतिगृह आणि शासकीय निवासी शाळा, विटा यांच्या संयुक्त विद्यमाने हा कार्यक्रम घेण्यात आला. यावेळी महाराष्ट्र अंधश्रद्धा निर्मूलन समितीचे कार्यकारिणी सदस्य वाघेश साळुंखे यांनी विविध प्रात्यक्षिके व प्रयोगांच्या माध्यमातून विद्यार्थ्यांना अंधश्रद्धा निर्मूलनाबाबत मार्गदर्शन केले. समाजामध्ये प्रचलित असलेल्या विविध अंधश्रद्धांमागील वास्तव विद्यार्थ्यांना प्रयोगांच्या माध्यमातून समजावून सांगत, कोणत्याही अंधश्रद्धेला बळी न पडता प्रत्येक गोष्टीचा वैज्ञानिक दृष्टिकोनातून विचार करावा, असे आवाहन त्यांनी केले. वैज्ञानिक दृष्टिकोन, चिकित्सक विचारसरणी आणि प्रश्न विचारण्याची वृत्ती अंगीकारल्यास अंधश्रद्धांचे निर्मूलन करण्यास मदत होईल, असेही त्यांनी सांगितले. समतादूत लता सुरवसे यांनी मनोगत व्यक्त केले. शासकीय निवासी शाळा, विटा येथील शिक्षिका श्रीमती निकम यांनी कार्यक्रमाचे सूत्रसंचालन केले तसेच आभार मानले. यावेळी शासकीय निवासी शाळा, विटाच्या मुख्याध्यापिका श्रीमती भोसले, शिक्षिका श्रीमती निकम यांच्यासह सर्व शिक्षकवृंद, डॉ. बाबासाहेब आंबेडकर मुलींचे शासकीय वसतिगृह, विटा च्या अधीक्षिका रत्नमाला जाधव, विद्यार्थी-विद्यार्थिनी तसेच कर्मचारी उपस्थित होते. 00000

सेवा संकल्प कार्यक्रमांतर्गत तासगाव येथे अंधश्रद्धा निर्मूलनाबाबत जनजागृती

- अंधश्रद्धेला बळी न पडता डोळसपणे विचार करण्याचे विद्यार्थिनींना आवाहन सांगली, दि. 5 (जि. मा. का.) : समाजामध्ये अंधश्रद्धा, नरबळी तसेच अमानुष व अघोरी प्रथांना कोणतेही स्थान नसून, अशा प्रथांविरोधात कायद्याची माहिती आणि वैज्ञानिक दृष्टिकोनातून जनजागृती होणे आवश्यक आहे. विद्यार्थिनींनी अंधश्रद्धेला बळी न पडता प्रत्येक गोष्टीकडे डोळसपणे पाहावे, असे आवाहन समतादूत सविता पाटील यांनी केले. तासगाव येथील सावित्रीबाई फुले मुलींचे शासकीय वसतिगृह येथे सेवा संकल्प कार्यक्रमांतर्गत अंधश्रद्धा निर्मूलन तसेच नरबळी आणि इतर अमानुष, अघोरी व दृष्ट प्रथा प्रतिबंध व निर्मूलन कायद्याबाबत जनजागृती कार्यक्रमाचे आयोजन करण्यात आले. यावेळी प्रमुख मार्गदर्शक म्हणून समतादूत सविता पाटील उपस्थित होत्या. यावेळी सविता पाटील यांनी सेवा संकल्प कार्यक्रमांतर्गत राबविण्यात येणाऱ्या विविध उपक्रमांची माहिती विद्यार्थिनींना दिली. तसेच अंधश्रद्धा निर्मूलन, नरबळी प्रतिबंध आणि अमानुष अघोरी प्रथांविरोधातील कायदेशीर तरतुदी याबाबत सविस्तर मार्गदर्शन केले. समाजात अंधश्रद्धेमुळे होणारे गैरप्रकार, फसवणूक आणि नागरिकांचे होणारे नुकसान टाळण्यासाठी प्रत्येकाने वैज्ञानिक दृष्टिकोन स्वीकारणे गरजेचे आहे. कोणत्याही अफवा, अघोरी प्रथा किंवा अंधश्रद्धेवर विश्वास न ठेवता त्यामागील सत्य जाणून घेण्याचा प्रयत्न करावा. विद्यार्थिनींनी स्वतः जागरूक राहून कुटुंब व समाजामध्येही अंधश्रद्धेविरोधात जनजागृती करावी, असे आवाहनही त्यांनी केले. कार्यक्रमादरम्यान स्वच्छता अभियानाचेही आयोजन करण्यात आले. विद्यार्थिनींनी उत्स्फूर्तपणे सहभाग घेत परिसर स्वच्छ केला. स्वच्छता, सामाजिक जाणीव आणि वैज्ञानिक दृष्टिकोन या मूल्यांचा अंगीकार करण्याचे आवाहन यावेळी करण्यात आले. वसतिगृहाच्या अधीक्षिका ऋचा राजपूत यांनी मनोगत व्यक्त करताना विद्यार्थिनींनी जीवनातील प्रत्येक बाबीकडे डोळसपणे पाहावे, योग्य-अयोग्य यातील फरक समजून घ्यावा आणि अंधश्रद्धेपासून दूर राहावे, असे मार्गदर्शन केले. कार्यक्रमाचे सूत्रसंचालन वसतिगृहातील विद्यार्थिनींनी केले. कार्यक्रमाच्या यशस्वी आयोजनासाठी वसतिगृहातील कर्मचारी तसेच विद्यार्थिनींचे सहकार्य लाभले. कार्यक्रमामुळे विद्यार्थिनींमध्ये अंधश्रद्धा निर्मूलन, कायदेविषयक जागरूकता, स्वच्छता आणि वैज्ञानिक दृष्टिकोनाबाबत सकारात्मक संदेश पोहोचला. 00000

‘जिल्हा कर्मयोगी २.०’, ‘सेवासंकल्प अभियानांतर्गत अधिकारी प्रशिक्षण कार्यशाळा

- सक्षम प्रशासन, कार्यक्षम कार्यसंस्कृती आणि नागरिककेंद्रित सेवा वितरणाच्या दिशेने जिल्हा परिषद सांगलीचे महत्त्वपूर्ण पाऊल सांगली, दि. 4 (जि. मा. का.) : महाराष्ट्र शासनाच्या प्रशासकीय सुधारणा व सुशासनाच्या संकल्पनेला अधिक बळकटी देण्याच्या उद्देशाने मुख्य कार्यकारी अधिकारी विशाल नरवाडे यांच्या मार्गदर्शनाखाली जिल्हा परिषद, सांगली येथे ‘जिल्हा कर्मयोगी २.०’ आणि ‘सेवासंकल्प अभियान २०२६’ अंतर्गत अधिकारी प्रशिक्षण कार्यशाळेचे आयोजन करण्यात आले. जिल्हा प्रशासनाची कार्यक्षमता वृद्धिंगत करणे, प्रशासकीय प्रक्रियांमध्ये सकारात्मक परिवर्तन घडवून आणणे तसेच नागरिकांना गतिमान, पारदर्शक व गुणवत्तापूर्ण सेवा उपलब्ध करून देणे, हा या प्रशिक्षणाचा प्रमुख उद्देश होता. महाराष्ट्र शासनाच्या सामान्य प्रशासन विभागाच्या निर्देशानुसार तसेच महाराष्ट्र इन्स्टिट्यूशन फॉर ट्रान्सफॉर्मेशन (MITRA) यांच्या मार्गदर्शनाखाली आयोजित या कार्यशाळेस जिल्हा परिषद, सांगलीचे सर्व विभागप्रमुख तसेच जिल्ह्यातील सर्व पंचायत समित्यांचे गट विकास अधिकारी उपस्थित होते. ‘जिल्हा कर्मयोगी २.०’ हा उपक्रम अधिकारी व कर्मचाऱ्यांच्या प्रशिक्षणापुरता मर्यादित नसून प्रशासकीय कार्यसंस्कृतीमध्ये गुणात्मक बदल घडवून आणणारा महत्त्वपूर्ण उपक्रम आहे. या माध्यमातून प्रशासकीय क्षमता विकास, परिणामकारक निर्णयप्रक्रिया, नेतृत्वगुणांचा विकास, नावीन्यपूर्ण कार्यपद्धतींचा अवलंब आणि तंत्रज्ञानाधारित प्रशासनाला चालना देण्यावर विशेष भर देण्यात येत आहे. ‘सेवासंकल्प अभियान २०२६’च्या उद्दिष्टांशी सुसंगतपणे नागरिकांना केंद्रस्थानी ठेवून प्रशासन अधिक संवेदनशील, उत्तरदायी आणि परिणामाभिमुख करण्यासाठी या प्रशिक्षण कार्यशाळेला विशेष महत्त्व देण्यात आले. शासकीय सेवांचे प्रभावी वितरण, प्रशासकीय कामकाजातील अनावश्यक विलंब कमी करणे, सेवा प्रक्रियांचे सुलभीकरण करणे आणि नागरिकांच्या अपेक्षांनुसार गुणवत्तापूर्ण सेवा उपलब्ध करून देण्यासाठी अधिकारी व कर्मचाऱ्यांची कार्यक्षमता वृद्धिंगत करण्यावर यावेळी भर देण्यात आला. या कार्यशाळेत Illume Knowledge Resources आणि MITRA Team यांच्या संयुक्त विद्यमाने क्षमता विकास, आधुनिक प्रशासकीय कार्यपद्धती, तंत्रज्ञानाचा प्रभावी वापर, कार्यप्रणालीतील सुधारणा, समन्वयात्मक नेतृत्व आणि परिणामकारक सेवा वितरण यासंदर्भात मार्गदर्शन करण्यात आले. बदलत्या प्रशासकीय आव्हानांना सामोरे जाण्यासाठी आवश्यक कौशल्ये, सकारात्मक दृष्टिकोन आणि लोकाभिमुख कार्यसंस्कृती विकसित करण्याच्या दृष्टीने प्रशिक्षणातील विविध संकल्पनांवर प्रकाश टाकण्यात आला. प्रशिक्षणाच्या माध्यमातून जिल्हा परिषद व पंचायत समिती स्तरावरील प्रशासकीय यंत्रणेमध्ये अधिक सुसूत्रता व समन्वय निर्माण करणे, कामकाजात पारदर्शकता व उत्तरदायित्व वृद्धिंगत करणे तसेच शासकीय योजनांची प्रभावी अंमलबजावणी सुनिश्चित करण्यावर विशेष लक्ष केंद्रित करण्यात आले. प्रशिक्षणातून प्राप्त ज्ञान व कौशल्यांचा प्रत्यक्ष प्रशासकीय कामकाजात प्रभावीपणे उपयोग करून सेवा वितरणाची गुणवत्ता उंचावण्याचे आवाहन करण्यात आले. जिल्हा परिषद, सांगलीचे मुख्य कार्यकारी अधिकारी विशाल नरवाडे यांच्या मार्गदर्शनाखाली आयोजित या उपक्रमातून प्रशासकीय क्षमता विकासासोबतच कर्तव्यनिष्ठा, लोकाभिमुखता, नवोपक्रम आणि परिणामकारक कार्यसंस्कृती रुजविण्याच्या दृष्टीने महत्त्वपूर्ण प्रयत्न करण्यात येत आहेत. ‘कर्मयोगी’ वृत्तीच्या माध्यमातून सक्षम अधिकारी आणि ‘सेवासंकल्प’च्या माध्यमातून संवेदनशील प्रशासन निर्माण करणे, हा या दोन्ही उपक्रमांचा केंद्रबिंदू आहे. प्रशासकीय कार्यक्षमतेचे रूपांतर नागरिकांच्या समाधानात आणि शासनाच्या धोरणांचे रूपांतर प्रभावी सेवा वितरणात करण्याच्या दृष्टीने हे प्रशिक्षण महत्त्वपूर्ण ठरणार आहे. 00000

#सेवासंकल्पअभियान सेवा संकल्प अभियानांतर्गत शिराळा तालुक्यातील कुसाईवाडी येथे महिला सक्षमीकरण, वृक्षारोपण, श्रमदान, वंचित कुटूंबाला नळ जोडणी, स्वच्छता अभियान, घरकुल लाभार्थीच्या घरी आशीर्वाद दीप प्रज्वलन असे विविध उपक्रम घेण्यात आले

#सेवासंकल्पअभियान सेवा संकल्प अभियानांतर्गत शिराळा तालुक्यातील कुसाईवाडी येथे महिला सक्षमीकरण, वृक्षारोपण, श्रमदान, वंचित कुटूंबाला नळ जोडणी, स्वच्छता अभियान, घरकुल लाभार्थीच्या घरी आशीर्वाद दीप प्रज्वलन असे विविध उपक्रम घेण्यात आले

#सेवासंकल्पअभियान2026 शिराळा पंचायत समिती अंतर्गत आज विविध ग्रामपंचायत मध्ये सेवा संकल्प अभियान अंतर्गत प्रधानमंत्री आवास योजना मधून घरकुल बांधकाम पूर्ण झालेल्या लाभार्थीच्या घरी आशीर्वादाचा दिप प्रज्वलीत करण्यात आल

#सेवासंकल्पअभियान2026 शिराळा पंचायत समिती अंतर्गत आज विविध ग्रामपंचायत मध्ये सेवा संकल्प अभियान अंतर्गत प्रधानमंत्री आवास योजना मधून घरकुल बांधकाम पूर्ण झालेल्या लाभार्थीच्या घरी आशीर्वादाचा दिप प्रज्वलीत करण्यात आला

#सेवासंकल्पअभियान2026 जय हनुमान हायस्कूल वळसंग शाळेने आज सेवा संकल्प उपक्रमांतर्गत अतिशय उत्तम अशी मानवी रांगोळी तयार केली

#सेवासंकल्पअभियान2026 जय हनुमान हायस्कूल वळसंग शाळेने आज सेवा संकल्प उपक्रमांतर्गत अतिशय उत्तम अशी मानवी रांगोळी तयार केली

सेवा संकल्प अभियानांतर्गत कवठेमहांकाळ येथे 7 ऑक्टोबर रोजी रक्तदान शिबिर

सांगली, दि. 3 (जि. मा. का.) : सेवा संकल्प अभियानांतर्गत जिल्हा शल्य चिकित्सक डॉ. विक्रमसिंह कदम यांच्या मार्गदर्शनाखाली उपजिल्हा रुग्णालय, कवठेमहांकाळ येथे बुधवार, दि. ७ ऑक्टोबर २०२६ रोजी सकाळी १० ते दुपारी २ या वेळेत रक्तदान शिबिराचे आयोजन करण्यात आले आहे. या शिबिरात नागरिक, युवक-युवती तसेच विविध सार्वजनिक मंडळांनी मोठ्या संख्येने सहभागी होऊन स्वेच्छेने रक्तदान करावे, असे आवाहन उपजिल्हा रुग्णालय, कवठेमहांकाळचे वैद्यकीय अधीक्षक डॉ. अजय भोसेकर यांनी केले आहे. अपघातग्रस्त, प्रसूतीतील माता, शस्त्रक्रिया होणारे रुग्ण, गंभीर आजारांनी ग्रस्त रुग्ण तसेच विविध आपत्कालीन परिस्थितींमध्ये रक्ताची मोठ्या प्रमाणात आवश्यकता भासते. रक्ताला कृत्रिम पर्याय उपलब्ध नसल्याने स्वेच्छेने केलेले रक्तदान अत्यंत महत्त्वाचे आहे. रक्तदानातून गरजू रुग्णांना वेळेत रक्त उपलब्ध होऊन त्यांचे प्राण वाचविण्यास मदत होते. या सामाजिक उपक्रमात नागरिकांनी उत्स्फूर्तपणे सहभागी होऊन रक्तदान करावे, असे आवाहन रुग्णालय प्रशासनातर्फे करण्यात आले आहे. 00000