मल्लखांब खेळातून मानसिक, शारीरिक संतुलन - जिल्हाधिकारी अशोक काकडे

- राज्यस्तरीय शालेय मल्लखांब स्पर्धा उत्साहात सुरू सांगली, दि. 12, (जि. मा. का.) : मल्लखांब हा भारताचा प्राचीन खेळ आहे. या खेळामध्ये मानसिक, शारीरिक संतुलन आणि धैर्य सुध्दा आहे. अनेक छत्रपती पुरस्कारार्थी या खेळामधील आहेत, ही आनंदाची बाब आहे. त्यामुळे या खेळाचा वसा आणि वारसा खेळाडुंनी जपावा, असे आवाहन जिल्हाधिकारी अशोक काकडे यांनी आज केले. जिल्हा क्रीडा परिषद व जिल्हा क्रीडा अधिकारी कार्यालय सांगली यांच्या वतीने तालुका क्रीडा संकुल मिरज येथे आयोजित राज्यस्तरीय 19 वर्षाखालील शालेय मुला-मुलींच्या मल्लखांब स्पर्धेच्या उद्घाटन कार्यक्रम प्रसंगी ते बोलत होते. यावेळी मिरज उपविभागीय अधिकारी उत्तम दिघे, तहसिलदार डॉ. अपर्णा मोरे-धुमाळ, जिल्हा क्रीडा अधिकारी किरण बोरवडेकर, शिवछत्रपती क्रीडा पुरस्कार विजेते बाबासाहेब समलेवाले, तालुका क्रीडा अधिकारी विकास माने, क्रीडा अधिकारी नरेश सावंत, क्रीडा मार्गदर्शक मधुरा सिंहासने यांच्यासह खेळाडू, व्यवस्थापक, पंच, निवड समिती सदस्य उपस्थित होते. जिल्हाधिकारी अशोक काकडे म्हणाले, खेळाडुंनी त्यांच्यामधील जे उत्तम आहे ते प्रकट करावे. या स्पर्धा निकोप वातावरणात पूर्ण कराव्यात. खेळाडुंनी खेळाचा आनंद मनमुराद लुटावा. आपल्याला विपरित परिस्थितीत संतुलन साधता आले पाहिजे, हे सर्व मल्लखांब खेळातून शक्य होते. या खेळाचे नाव देशभरात जगभरात, नेण्यासाठी प्रयत्न करावा, असे सांगून त्यांच्या भावी वाटचालीस शुभेच्छा दिल्या. तसेच ही स्पर्धा सांगली जिल्ह्यामध्ये घेण्याचा मान मिळाल्याबद्दल त्यांनी येथील तज्ज्ञ मार्गदर्शकांचे अभिनंदन केले. यावेळी आशियाई ॲक्रोबेटिक्स स्पर्धेमध्ये प्राविण्य प्राप्त केलेल्या खेळाडुंचा सन्मान जिल्हाधिकारी अशोक काकडे यांच्या हस्ते करण्यात आला. या स्पर्धेसाठी राज्यातील एकूण आठ विभागातून चार मुले व चार मुली तसेच पंच, निवड समिती सदस्य, तांत्रिक अधिकारी असे एकूण 125 खेळाडू व अधिकारी यांचा सहभाग आहे. या स्पर्धेतील विजयी खेळाडू उज्जैन (मध्य प्रदेश) या ठिकाणी होणाऱ्या राष्ट्रीय मल्लखांब स्पर्धेत महाराष्ट्राचे प्रतिनिधीत्व करणार आहेत. प्रास्ताविक जिल्हा क्रीडा अधिकारी किरण बोरवडेकर यांनी केले. सूत्रसंचालन क्रीडा अधिकारी बालाजी बरबडे यांनी केले. आभार तालुका क्रीडा अधिकारी विकास माने यांनी मानले. 00000

राज्यस्तरीय शालेय मल्लखांब स्पर्धा आजपासून

सांगली, दि. 11, (जि. मा. का.) : जिल्हा क्रीडा अधिकारी कार्यालय सांगली व जिल्हा क्रीडा परिषद सांगली यांच्या संयुक्त विद्यमाने राज्यस्तरीय 19 वर्षाखालील शालेय मुला-मुलींच्या मल्लखांब स्पर्धांचे आयोजन तालुका क्रीडा संकुल मिरज या ठिकाणी दिनांक 12 व 13 नोव्हेंबर 2025 या कालावधीत करण्यात आले आहे. या स्पर्धेचा उद्घाटन समारंभ बुधवार दिनांक 12 नोव्हेंबर 2025 रोजी सकाळी 10 वाजता जिल्हाधिकारी अशोक काकडे यांच्याहस्ते होणार असल्याचे जिल्हा क्रीडा अधिकारी किरण बोरवडेकर यांनी प्रसिध्दीपत्रकाव्दारे कळविले आहे. या स्पर्धेसाठी कोल्हापूर, पुणे, मुंबई ,नाशिक, छत्रपती संभाजी नगर, अमरावती, नागपूर व लातूर अशा 8 विभागातून एकूण 64 स्पर्धक सहभागी होणार आहेत. यामधून राज्याच्या टीमसाठी निवड केली जाणार आहे. स्पर्धेसाठी सहभागी होणाऱ्या खेळाडूंची निवासाची व भोजनाची व्यवस्था जिल्हा क्रीडा संकुल सांगली येथे करण्यात आलेली आहे. या स्पर्धेसाठी खेळाडू, व्यवस्थापक, पंच, निवड समिती सदस्य उपस्थित होत आहेत. स्पर्धेच्या अनुषंगाने सर्व तयारी पूर्ण झाली असल्याचे जिल्हा क्रीडा अधिकारी किरण बोरवडेकर यांनी प्रसिध्दी पत्रकात म्हटले आहे. 0000

नगरपरिषद / नगरपंचायत सार्वत्रिक निवडणूक आचारसंहिता काय करावे? व काय करू नये?

नगरपरिषद / नगरपंचायत सार्वत्रिक निवडणूक आचारसंहिता काय करावे? व काय करू नये? राज्य निवडणूक आयोगाने राज्यातील 246 नगरपरिषदा व 42 नगरपंचायतींच्या (एकूण 288) सदस्य पदासाठी आणि थेट अध्यक्षपदाच्या सार्वत्रिक निवडणुकांकरिता दिनांक 4 नोव्हेंबर 2025 रोजी निवडणूक कार्यक्रम घोषित केला आहे. यानुसार मतदान 2 डिसेंबर 2025 रोजी व मतमोजणी 3 डिसेंबर 2025 रोजी पार पडणार आहे. या कार्यक्रमानुसार सांगली जिल्ह्यातील आष्टा, उरूण-ईश्वरपूर, जत, पलूस, तासगाव व विटा या 6 नगरपरिषदा आणि आटपाडी व शिराळा या 2 नगरपंचायतींच्या कार्यक्षेत्रात निवडणूक कार्यक्रम घोषित केल्यापासून आदर्श आचारसंहिता लागू झाली असून ती निवडणुकीचा निकाल जाहीर होईपर्यंत अंमलात राहील. संबंधित नगरपरिषद, नगरपंचायत क्षेत्रात आदर्श आचारसंहितेचे काटेकोरपणे पालन होण्याच्या दृष्टीने काय करावे व काय करू नये याबाबतची सूची जाणून घेऊया. ही सूची उदाहरणदाखल असून ती सर्वसमावेशक नाही. या व्यतिरिक्त वेळोवेळी जारी केलेले आदेश, निर्देश / सूचना यांचे काटेकोरपणे पालन करणे आवश्यक आहे. काय करावे? १. चालू असलेले कार्यक्रम / योजना पुढे सुरू ठेवता येतील. २. ज्याविषयी शंका निर्माण होईल, अशा बाबींच्या संबंधात, राज्य निवडणूक आयोग /महानगरपालिका आयुक्त/ जिल्हाधिकारी यांच्याकडून स्पष्टीकरण / मान्यता प्राप्त करण्यात यावी. ३. पूर, अवर्षण, साथीचे रोग किंवा अन्य नैसर्गिक आपत्ती यामुळे बाधित झालेल्या क्षेत्रातील जनतेसाठी साह्यकारी व पुनर्वसनाच्या उपाययोजना चालू करता येतील व या संदर्भात चालू असलेल्या योजना पुढे सुरु ठेवता येतील. ४. मरणासन्न किंवा गंभीररित्या आजारी असलेल्या व्यक्तींना रोख रक्कम किंवा वैद्यकीय सवलती देण्याचे समुचित मान्यतेने पुढे चालू ठेवता येईल. ५. मैदानासारख्या सार्वजनिक जागा सर्व पक्षांना / निवडणुकीत उभे असलेल्या उमेदवारांना निवडणूक सभा घेण्यासाठी निःपक्षपातीपणे उपलब्ध करुन दिल्या पाहिजे. त्याचप्रमाणे सर्व पक्षांना/ निवडणुकीस उभे असलेल्या उमेदवारांना हेलिपॅडचा वापर नि:पक्षपातीपणे उपलब्ध करुन दिला पाहिजे. ६. विश्रामगृहे, डाकबंगले व इतर शासकीय निवासस्थाने वगैरे बाबतीत निवडणूक आयोगाने व त्या अनुषंगाने शासनाने काढलेल्या आदेशास संपूर्णतः अधीन राहून सर्व राजकीय पक्षांना व निवडणुकीस उभे असलेल्या सर्व उमेदवारांना समानतेच्या तत्त्वावर उपलब्ध करुन देता येणे अनुज्ञेय असल्यास त्याप्रमाणे देण्यात यावेत. ७. इतर राजकीय पक्ष किंवा उमेदवार यांच्यावर करण्यात येणारी टीका ही त्यांची धोरणे, कार्यक्रम, पूर्वीची कामगिरी, पार पडलेली कामे, केवळ या बाबींशी संबंधित असावी. ८. शांततामय व उपद्रवरहित गृहस्थ जीवन जगण्याच्या प्रत्येक व्यक्तीच्या अधिकाराचे पूर्णपणे जतन करण्यात यावे. ९. प्रस्तावित सभेची जागा व वेळ याविषयी स्थानिक पोलीस प्राधिकाऱ्यांना पूर्ण माहिती देण्यात यावी आणि त्यासाठी आवश्यक त्या सर्व परवानग्या मिळविण्यात याव्यात. १०. प्रस्तावित सभेच्या जागी निर्बंधात्मक व प्रतिबंधक आदेश जारी केलेले असल्यास त्यांच पूर्णपणे पालन करण्यात यावे. आवश्यक असल्यास त्याबाबत सवलत मिळण्याविषयी अर्ज केले पाहिजेत व वेळीच अशी सवलत मिळविली पाहिजे. ११. प्रस्तावित सभेसाठी ध्वनिक्षेपक (Loudspeaker) किंवा कोणत्याही इतर अशा सवलतीचा वापर करण्यासाठी योग्य परवानगी मिळविली पाहिजे. १२. सभेमध्ये अडथळे आणणाऱ्या किंवा अव्यवस्था निर्माण करणाऱ्या व्यक्तींना प्रतिबंध करण्यासाठी पोलिसांचे सहाय्य मिळविण्यात यावे. १३. कोणत्याही मिरवणुकीची प्रारंभीची वेळ व जागा, मिरवणूक ज्या मार्गाने जाईल तो मार्ग व मिरवणुकीची अखेर होईल अशी वेळ व स्थान ही बाब आगाऊ स्वरुपात निश्चितपणे ठरविण्यात यावी व पोलीस प्राधिकाऱ्यांकडून त्यासाठी आगाऊ परवानगी घेण्यात यावी. १४. मिरवणूक ज्या वस्तीमधून जात असेल, त्या वस्त्यांबाबत कोणतेही निर्बंधात्मक आदेश जारी केलेले असल्यास त्या विषयी खात्री करुन त्याचे पूर्णपणे अनुपालन करण्यात यावे, त्याचप्रमाणे सर्व वाहतूक नियमांचे व अन्य निर्बंधांचे अनुपालन करण्यात यावे. १५. मिरवणुकीमुळे वाहतुकीत कोणताही अडथळा निर्माण होऊ देऊ नये. १६. ज्यांचा क्षेपके किंवा हत्यारे म्हणून गैरवापर होऊ शकेल अशा कोणत्याही वस्तू मिरवणुकीत सहभागी असलेल्या व्यक्तींनी बाळगू नयेत. १७. मतदानाचे काम शांतता व सुव्यवस्थेने पार पडावे यासाठी सर्वतोपरी सर्व निवडणूक अधिकाऱ्यांना सहकार्य देण्यात यावे. उमेदवार व त्याच्या अधिकृत कार्यकर्त्यांनी विहित परवानगी घेऊन योग्य असे बिल्ले व ओळखपत्रे, निवडणूक प्रशासनाकडून मिळवावीत व ती निवडणुकीचे काम करणाऱ्या व्यक्तींनी ती दर्शनी भागावर लावावीत. १८. मतदारांना देण्यात येणाऱ्या ओळखचिठ्ठया साध्या (पांढऱ्या) कागदावर देण्यात येतील व त्यावर कोणतेही चिन्ह, उमेदवाराचे किंवा पक्षाचे नाव यांचा निर्देश असणार नाही. १९. मतदानाच्या दिवशी वाहनांच्या वापरावरील निर्बंधांचे पूर्णपणे पालन करण्यात यावे. २०. राज्य निवडणूक आयोगाचे, महानगरपालिका आयुक्त यांचे अथवा जिल्हाधिकाऱ्यांचे किंवा त्यांनी प्रधिकृत केलेल्या अधिकाऱ्याने दिलेले वैध प्राधिकारपत्र असल्याखेरीज कोणत्याही व्यक्तीस कोणत्याहीवेळी मतदान कक्षात प्रवेश करता येणार नाही. वरच्या दर्जाच्या कोणत्याही व्यक्तींना (उदा. मुख्यमंत्री, मंत्री, राज्यमंत्री, संसद सदस्य, विधानसभा सदस्य, विधानपरिषद सदस्य) यांनाही यातून सूट देण्यात आलेली नाही. २१. निवडणूक पार पाडण्याच्या संबंधातील कोणतीही तक्रार किंवा समस्या, निवडणूक निर्णय अधिकारी/ क्षेत्र/ प्रभाग दंडाधिकारी यांच्या किंवा राज्य निवडणूक आयोग यांनी नियुक्त केलेल्या निरीक्षकांच्या निदर्शनास आणून देण्यात यावी. २२. राज्य निवडणूक आयोग / आयुक्त, महानगरपालिका/ जिल्हाधिकारी / निवडणूक निर्णय अधिकारी यांचे निवडणुकीच्या विविध पैलूंच्या संबंधातील सर्व बाबींविषयीचे निर्देश / आदेश/अनुदेश यांचे पालन करण्यात यावे. काय करु नये? १. शासकीय वाहने किंवा कर्मचारी वर्ग किंवा यंत्रणा यांचा निवडणूक प्रचारविषयक कामासाठी वापर करण्यात येऊ नये. शासकीय वाहनात पुढील कार्यालयाच्या वाहनाचा समावेश असेल. (१) केंद्र शासन (२) राज्य शासन (३) केंद्र व राज्य शासनाचे सार्वजनिक उपक्रम, मंडळे, महामंडळे (४) केंद्र शासन व राज्य शासनाच्या संयुक्त क्षेत्रातील उपक्रम (५) स्थानिक स्वराज्य संस्था (६) महानगरपालिका (७) नगर परिषदा / नगर पंचायती (८) पणन मंडळ (कोणत्याही नावाचे) (९) सहकारी संस्था (१०) जिल्हा परिषदा/ पंचायत समित्या ग्रामपंचायती (११) ज्यामध्ये सार्वजनिक निधी मग तो एकूण निधीच्या हिश्श्यातील कितीही अल्पांशाने असो गुंतवण्यात आला आहे, अशी कोणतीही संस्था व (१२) संरक्षण मंत्रालय, गृह मंत्रालय, राज्य शासन, केंद्रीय पोलिस संघटना इत्यादीच्या मालकीची असलेली पुढील वाहने - मालमोटारी, लॉरी, टेंपो, जीपगाड्या, मोटारगाड्या, ऑटोरिक्षा, बसगाड्या, विमाने, हेलिकॉप्टर, जहाजे, बोटी, हॉवर क्रॉफ्ट व इतर सर्व वाहने. २. सत्तेमध्ये असलेला पक्ष/शासन यांनी साध्य केलेल्या उद्दिष्टांबाबत सरकारी कोषागाराच्या खर्चाने कोणतीही जाहिरात देऊ नये. ३. कोणत्याही वित्तीय अनुदानाची घोषणा करणे, कोनशिला बसविणे, नवीन रस्ते इ. बांधण्याचे वचन देणे इत्यादी गोष्टी करू नयेत. ४. शासन/सार्वजनिक उपक्रम याच्या सेवेत कोणत्याही तदर्थ (Ad hoc) नियुक्त्या करु नयेत. ५. मंत्री (राज्यमंत्री व उपमंत्रीसहित) हे उमेदवार असल्याखेरीज किंवा प्राधिकृत प्रतिनिधी असल्याखेरीज किंवा मतदानासाठी मतदार या नात्याने असेल त्याखेरीज मतदान कक्षामध्ये किंवा मतमोजणीच्या जागी प्रवेश करणार नाहीत. ६. निवडणूक मोहीम/प्रचार यांच्या जोडीने कोणतेही सरकारी काम पार पाडण्यात येऊ नये. ७. मतदारास आर्थिक किंवा अन्य प्रकारचे कोणतेही प्रलोभन दाखविण्यात येऊ नये. ८. मतदाराच्या जातीय व धार्मिक भावनांना आवाहन करण्यात येऊ नये. ९. विभिन्न जाती, जमाती यांच्यातील किंवा धार्मिक किंवा भाषिक गटातील मतभेद जामुळे अधिक तीव्र होतील किंवा परस्परातील वैमनस्यः वाढेल किंवा त्यांच्यात तणाव निर्माण होईल अशी कोणतीही कृती करण्याचा प्रयत्न करण्यात येऊ नये. १०. इतर पक्षांचे कोणतेही नेते किंवा कार्यकर्ते यांच्या सार्वजनिक कार्याशी संबंधित नसेल अशा त्यांच्या खाजगी जीवनातील कोणत्याही पैलूवर टीका करण्याची परवानगी देण्यात येऊ नये. ११. ज्यांचा खरेखोटेपणा पडताळून पाहिलेला नाही, असे आरोप ठेवून किंवा त्यास विकृत स्वरुप देऊन इतर पक्ष किवा त्यांचे कार्यकर्ते यांच्यावर टीका करण्यात येऊ नये. १२. निवडणूक प्रचार तसेच भाषणे, निवडणूक प्रचाराचे फलक, संगीत इत्यादी साठी कोणत्याही प्रार्थनास्थळांचा वापर करण्यात येऊ नये. १३. लाच देणे, आवजवी प्रभाव टाकणे, मतदारांना धाकदपटशा दाखविणे, खोट्या नावाने मतदान करणे, मतदारांना मतदान कक्षापर्यंत पोहोचविणे व तेथून परत नेणे यासारख्या भ्रष्ट प्रथा किंवा निवडणूक विषयक अपराध करण्यास प्रतिबंध आहेत. १४. व्यक्तींची मते किंवा कृत्ये याविरुध्द निषेध व्यक्त करण्यासाठी त्यांच्या घरासमोर निदर्शने किंवा धरणे धरण्यात येऊ नये. १५. कोणत्याही व्यक्तीला, अन्य कोणत्याही व्यक्तीची जमीन, इमारत आवारभिंत इत्यादींचा वापर त्यांच्या मालकांच्या परवानगीखेरीज करणे, ध्वजदंड उभारणे, कापडी फलक लावणे, नोटीशी चिकटविणे किंवा घोषणा लिहिणे इत्यादी करता येणार नाही. यामध्ये शासकीय, सार्वजनिक व खाजगी जागांचा समावेश असेल. १६. इतर राजकीय पक्षांच्या किंवा उमेदवारांच्या सार्वजनिक सभांमध्ये किंवा मिरवणुकीत कोणत्याही प्रकारचा अडथळा निर्माण करण्यात येऊ नये. १७. एका पक्षाची जेथे सभा चालू असेल अशा जागी दुसऱ्या पक्षाद्वारे मिरवणूक काढण्यात येऊ नये. १८. दुसऱ्या पक्षांनी किंवा उमेदवारांनी लावलेली प्रचारपत्रके, भित्तीपत्रके काढून टाकण्यात येऊ नयेत. मात्र याबाबत काही आक्षेप असल्यास पोलिसांच्या किंवा निवडणूक निर्णय अधिकारी यांच्या निदर्शनास आणावे. १९. मतदानाच्या दिवशी ओळखचिठ्ठ्या वितरीत करण्याच्या जागी किंवा मतदान कक्षाजवळ प्रचारपत्रके, पक्षांचे ध्वज, चिन्हे किंवा इतर प्रचार साहित्य यांचे प्रदर्शन करु नये. २०. ध्वनिक्षेपकांचा मग ते एकाच जागी लावलेले असोत किंवा फिरत्या वाहनांवर बसविलेले असोत, सकाळी ६.०० वाजण्यापूर्वी किंवा रात्री १०.०० वाजल्यानंतर आणि संबंधित प्राधिकाऱ्यांची लेखी पूर्वपरवानगी घेतलेली असल्याखेरीज वापर करु नये. तसेच याबाबत असलेले The Noise Pollution (Regulation and Control) Rules, 2000 ची काटेकोरपणे अंमलबजावणी करण्यात यावी. २१. तसेच संबंधित प्राधिकाऱ्यांची लेखी पूर्वपरवानगी असल्याखेरीज सार्वजनिक सभेच्या जागी किंवा मिरवणुकीत किंवा प्रचारफेरीत ध्वनिक्षेपकाचा वापर करू नये. अशा सभा/ प्रचारफेरी रात्री १०.०० वाजल्यानंतर चालू ठेवण्याची परवानगी देण्यात येणार नाही. याबाबत मा. सर्वोच्च न्यायालयाच्या आदेशाचे पालन व्हावे तसेच घालून दिलेल्या अटींचे पालन करावे. याखेरीज, स्थानिक कायदे, त्या क्षेत्रातील सुरक्षिततेच्या आवश्यकतेचा स्थानिक दृष्टीकोन आणि हवामान, सणासुदीचे दिवस, परिक्षेचा काळ यांच्या अधीनतेने असतील. २२. निवडणुकीच्या काळात कोणत्याही प्रकारच्या पैशाचे, मद्याचे, वस्तूंचे वाटप करण्यात येऊ नये. (संकलन – जिल्हा माहिती कार्यालय, सांगली)

शेतकऱ्यांना नवीन बाजारपेठांचा लाभासाठी शुक्रवारी उत्पादक खरेदीदार संमेलन - जिल्हाधिकारी अशोक काकडे

सांगली, दि. 10, (जि. मा. का.) : शेतकऱ्यांना हमखास व स्थिर बाजारपेठ उपलब्ध व्हावी, शेतकरी, व्यापारी व निर्यातदार यांच्यात थेट संवादाची संधी उपलब्ध व्हावी, स्थानिक शेतकऱ्यांना नवीन बाजारपेठांचा लाभ घेता यावा, तसेच जिल्ह्यातील कृषी उद्योगास व निर्यातीस चालना मिळण्यासाठी सांगली येथे शुक्रवार, दिनांक 14 नोव्हेंबर 2025 रोजी सकाळी 10 वाजता उत्पादक खरेदीदार (बायर-सेलर मीट) संमेलन घेण्यात येणार आहे. हे संमेलन दीपायन बँक्वेट हॉल, जुने आरटीओ ऑफिस समोर, माधवनगर रोड, सांगली येथे आयोजित करण्यात आल्याची माहिती जिल्हाधिकारी अशोक काकडे यांनी दिली. जिल्हाधिकारी अशोक काकडे म्हणाले, या उत्पादक खरेदीदार संमेलनामध्ये 100 पेक्षा जास्त खरेदीदार सहभाग घेणार आहेत. सांगली जिल्ह्यातील शेतकऱ्यांनी उत्पादित केलेल्या मालाला या माध्यमातून नवीन बाजारपेठ निर्माण होणार आहे. या संमेलनात बेदाणा, हळद, परदेशी भाजीपाला, द्राक्षे, डाळिंब, पेरू, सीताफळ, बाजरी, मटकी व इतर तृणधान्य प्रक्रिया केलेली उत्पादने यांचे प्रदर्शन ठेवण्यात आले असून, जास्तीत जास्त शेतकऱ्यांनी सहभागी होऊन या सुवर्णसंधीचा लाभ घ्यावा, असे आवाहन त्यांनी केले. जिल्हाधिकारी अशोक काकडे म्हणाले, सांगली जिल्ह्यातील काही भाग पूर्वी दुष्काळी होता. परंतु, आता ताकारी, टेंभू, म्हैसाळ, आरफळ या उपसा जलसिंचन योजनांमुळे पूर्णपणे बागायत झालेला आहे. शेतक‌ऱ्यांनी पीक पद्धतीत बदल करून आता सांगली जिल्ह्यातून मोठ्या प्रमाणावर द्राक्ष, बेदाणा, डाळिंब, केळी या फळपिकांचे उत्पादन करण्यात येते व देशांतर्गत तसेच परदेशी बाजारपेठेत निर्यात करण्यात येते. विशेषतः द्राक्ष व बेदाणा निर्यातीसाठी सांगली जिल्ह्याची विशेष ओळख आहे. या फळपिकांना आंतरराष्ट्रीय बाजारपेठेत मोठी मागणी आहे. त्यामुळे या नवीन बाजारपेठांची ओळख शेतकऱ्यांना होण्यासाठी हे संमेलन उपयुक्त ठरेल, असा विश्वास त्यांनी व्यक्त केला. 00000

नगरपरिषद, नगरपंचायत सार्वत्रिक निवडणूक 2025

नगरपरिषद, नगरपंचायतींमध्ये अडीच लाख मतदार, 291 मतदान केंद्रे - जिल्हाधिकारी अशोक काकडे सांगली, दि. 10, (जि. मा. का.) : राज्य निवडणूक आयोगाने जाहीर केलेल्या नगरपरिषद, नगरपंचायत निवडणूक कार्यक्रमानुसार सांगली जिल्ह्यातील 6 नगरपरिषदा व 2 नगरपंचायतींमध्ये निवडणूक होत आहे. या सर्व नगरपरिषद / नगरपंचायतींमध्ये एकूण 2 लाख 57 हजार 977 इतके मतदार असून एकूण 291 मतदान केंद्रे आहेत. निवडणूक कार्यक्रमानुसार दि. 2 डिसेंबर 2025 रोजी मतदान व दि. 3 डिसेंबर 2025 रोजी मतमोजणी होणार आहे. लोकशाही बळकटीकरणासाठी जास्तीत जास्त नागरिकांनी मतदानाचा हक्क बजावावा, असे आवाहन जिल्हाधिकारी अशोक काकडे यांनी केले. जिल्हाधिकारी कार्यालयात नगरपरिषद / नगरपंचायत निवडणुकीच्या अनुषंगाने माहिती देताना जिल्हाधिकारी अशोक काकडे म्हणाले, जिल्ह्यात निवडणूक होत असलेल्या नगरपरिषदेपैकी उरूण-ईश्वरपूर व विटा या ब वर्ग नगरपरिषदा आहेत तर आष्टा, तासगाव, जत, पलूस या क वर्ग नगरपरिषदा आहेत. शिराळा व आटपाडी या नगरपंचायती आहेत. या सर्व नगरपरिषद / नगरपंचायतींमध्ये एकूण 2 लाख 57 हजार 977 इतके मतदार असून एकूण 291 मतदान केंद्रे आहेत. एकूण 107 प्रभाग असून एकूण सदस्य संख्या 181 आहे. यापैकी महिला सदस्य संख्या 92 आहे. एकूण 181 सदस्य संख्यैपैकी अनुसूचित जाती 24, अनुसूचित जमाती 01, नागरिकांचा मागास प्रवर्ग 48 व सर्वसाधारण 108 सदस्य संख्या आहे. जिल्हाधिकारी अशोक काकडे म्हणाले, दिनांक 10 नोव्हेंबरपासून नामनिर्देशन भरण्याची प्रक्रिया सुरू झाली आहे. दिनांक 17 नोव्हेंबर रोजी दुपारी 3 वाजेपर्यंत नामनिर्देशनपत्रे भरणे व स्वीकारण्याचा कालावधी आहे. नामनिर्देशनपत्राची छाननी व वैधरित्या नामनिर्देशित झालेल्या उमेदवारांची यादी प्रसिध्द करण्याचा दिनांक 18 नोव्हेंबर आहे. नामनिर्देशन पत्रे मागे घेण्याचा अंतिम दिनांक अपील नसेल तेथे दि. 19 ते 21 नोव्हेंबर दुपारी 3 वाजेपर्यंत आहे, अपील असल्यास दि. 21 ते 25 नोव्हेंबर असा आहे. अपीलाचा निर्णय ज्या तारखेस करण्यात येईल त्या तारखेनंतर तिसऱ्या दिवशी किंवा तत्पूर्वी मात्र दि. 25 नोव्हेंबरपर्यंत. निवडणूक चिन्ह नेमून देण्याचा तसेच अंतिमरित्या निवडणूक लढविणाऱ्या उमेदवारांची यादी प्रसिध्द करण्याचा दिनांक 26 नोव्हेंबर आहे. मतदान 2 डिसेंबर रोजी सकाळी 7.30 पासून ते सायंकाळी 5.30 वाजेपर्यंत आहे. मतमोजणी दिनांक 3 डिसेंबर रोजी सकाळी 10 वाजल्यापासून संबंधित नगरपरिषद / नगरपंचायत क्षेत्रात होणार आहे. निकाल जाहीर झाल्यानंतर आचारसंहिता संपुष्टात येईल, असे ते यावेळी म्हणाले. नगरपरिषदा व नगरपंचायतींच्या निवडणुकांतील ब वर्ग नगरपरिषदेसाठी (विटा व उरूण-ईश्वरपूर) थेट अध्यक्ष पदासाठी 11 लाख 25 हजार व सदस्य पदासाठी 3 लाख 50 हजार खर्च मर्यादा आहे. क वर्ग नगरपरिषदेसाठी (आष्टा, तासगाव, जत व पलूस) थेट अध्यक्ष पदासाठी 7 लाख 50 हजार व सदस्य पदासाठी 2 लाख 50 हजार तर नगरपंचायत (शिराळा व आटपाडी) थेट अध्यक्ष पदासाठी 6 लाख रूपये व सदस्य पदासाठी 2 लाख 25 हजार रूपये खर्च मर्यादा असल्याचे जिल्हाधिकारी अशोक काकडे यांनी सांगितले. स्वीप उपक्रमांतर्गत मतदार जनजागृती करण्यात येत असून या अभियानाचा उद्देश प्रत्येक पात्र मतदाराने आपले मतदानाचे कर्तव्य न चुकवता पार पाडावे आणि लोकशाही बळकट करावी असल्याचे ते यावेळी म्हणाले. 00000

दुचाकी वाहनाकरिता बुधवारपासून नवी मालिका

सांगली, दि. 10, (जि. मा. का.) : उपप्रादेशिक परिवहन कार्यालय, सांगलीकरिता नव्याने नोंदणी होणाऱ्या दुचाकी वाहनांकरिता एम एच 10 ई यू (EU) ही नवीन मालिका बुधवार, दि. 12 नोव्हेंबर 2025 पासून सुरू करण्यात येणार आहे. ही माहिती उपप्रादेशिक परिवहन अधिकारी प्रसाद गाजरे यांनी प्रसिध्दी-पत्रकाव्दारे दिली आहे. एम एच 10 ई यू (EU) या मालिकेव्यतिरिक्त इतर वाहनांसाठी आकर्षक क्रमांक हवा असेल तर तिप्पट फी भरून आकर्षक नोंदणी क्रमांक देण्यात येईल. पसंतीच्या नोंदणी क्रमांकासाठी प्रथम येणाऱ्यास प्रथम प्राधान्य दिले जाईल. पसंतीच्या नोंदणी क्रमांकाच्या अर्जासोबत केंद्रीय मोटार वाहन नियम, 1989 च्या नियम 4 तसेच महाराष्ट्र मोटार वाहन नियमाच्या 5(अ) मध्ये विहित केलेल्या पुराव्याची छायांकित प्रत, आधार कार्ड, मतदार ओळखपत्र, पासपोर्ट, पॅनकार्ड इत्यादिंची साक्षांकित प्रत, ई-मेल आयडी आवश्यक आहे. पसंतीचे नोंदणी क्रमांक वाहन 4.0 या संगणकीय प्रणालीवर देण्यात येणार असून त्याची वेळ सकाळी 11 ते दुपारी 3 पर्यंत आहे. पसंतीच्या नोंदणी क्रमांकाच्या अर्जासोबत विहित शुल्काचा डिमांड ड्राफ्ट सादर करणे बंधनकारक आहे. एकाच क्रमांकासाठी अनेक अर्ज आल्यास दि. 13 नोव्हेंबर 2025 रोजी दुपारी 4 वाजेपर्यंत निर्धारित फी पेक्षा जास्त रकमेचा डीडी जो अर्जदार सादर करेल, त्यास तो क्रमांक दिला जाईल. आकर्षक क्रमांकासाठी 180 दिवसांच्या आत वाहन नोंदणी करणे बंधनकारक राहील, असे प्रसिध्दीपत्रकात म्हटले आहे. 00000

राष्ट्रीय एकता दिनानिमित्त शुक्रवारी सांगलीत, उरूण ईश्वरपूरमध्ये शनिवारी पदयात्रा

सांगली, दि. 10 (जि. मा. का.) : राष्ट्रीय एकता दिनानिमित्त शुक्रवार, दि. 14 नोव्हेंबर रोजी सांगली येथे व शनिवार, दि. 15 नोव्हेंबर रोजी उरूण ईश्वरपूरमध्ये पदयात्रेचे आयोजन केल्याची माहिती मेरा युवा भारत, सांगलीचे जिल्हा युवा अधिकारी राहुल डोंगरे यांनी प्रसिद्धीपत्रकाद्वारे दिली आहे. हा कार्यक्रम आणि उपक्रम माय भारत पोर्टलवर होत आहे. या पोर्टलवर नोंद करून जिल्ह्यातील नागरिकांनी या ऐतिहासिक उपक्रमात सहभागी होऊन सक्रियपणे सहकार्य करावे, असे आवाहन प्रसिध्दीपत्रकात करण्यात आले आहे. पहिली “जिल्हास्तरीय युनिटी मार्च/पदयात्रा” दिनांक 14 नोव्हेंबर 2025 रोजी सकाळी 7.30 वाजता तरुण भारत स्टेडियम सांगली येथून सुरू होऊन छत्रपती शिवाजी महाराज स्टेडियम सांगली या ठिकाणी समाप्त होईल. तसेच दुसरी जिल्हास्तरीय युनिटी मार्च/पदयात्रा दिनांक 15 नोव्हेंबर 2025 रोजी सकाळी 7.30 वा. उरूण ईश्वरपूर येथील क्रांतिसिंह नाना पाटील पुतळा ते छत्रपती शिवाजी महाराज पुतळा अशी काढण्यात येणार आहे. मेरा युवा भारत (युवा कार्यक्रम आणि क्रीडा मंत्रालय, भारत सरकार) यांच्यामार्फत 2025 हे वर्ष भारताचे लोहपुरुष आणि राष्ट्रीय एकात्मतेचे प्रमुख शिल्पकार सरदार वल्लभभाई पटेल यांची 150 वी जयंती वर्ष म्हणून साजरे केले जात आहे. याचे औचित्य साधून राष्ट्रीय एकता दिनानिमित्त 31 ऑक्टोबर ते 25 नोव्हेंबर 2025 दरम्यान संपूर्ण भारतभर जिल्हास्तरीय पदयात्रा आयोजित केल्या जाणार आहेत. या अनुषंगाने सांगली जिल्ह्यात या दोन “जिल्हास्तरीय युनिटी मार्च/पदयात्रा” आयोजित केल्या जात आहेत. या पदयात्रेसोबत स्वच्छता मोहीम, व्यसनमुक्ती मोहीम, सरदार पटेल यांच्या विचारावर चर्चासत्रे, वादविवाद स्पर्धा इत्यादी आयोजित केल्या जाणार आहेत. या उपक्रमात जिल्हा प्रशासन, माय भारत, शाळा, महाविद्यालय, स्थानिक युवा संघटना, एनएसएस, एनसीसी स्वयंसेवक आणि भारत स्काऊट गाईड युनिट्स यांचा सहभाग असेल, असे प्रसिध्दी पत्रकात म्हटले आहे. 00000