घरकुल योजनेचा लाभ घेण्यासाठी 9 मार्च पर्यंत अर्ज सादर करण्याचे आवाहन

सांगली दि. 14 (जि.मा.का.) : जिल्हा परिषदेच्या समाज कल्याण विभागाकडून 20 टक्के स्वीय निधीमधून सन 2022-23 मध्ये घरकुल योजना राबविण्यात येत आहे. ही योजना अनुसूचित जाती, अनुसूचित जमाती, वि.जा. व भ.ज., नवबौध्द प्रवर्गातील लाभार्थ्यांसाठी आहे. या योजनेचा लाभ घेण्यासाठी जिल्ह्यातील पात्र लाभार्थ्यांनी पंचायत समितीकडे दि. 9 मार्च 2023 पर्यंत अर्ज सादर करावेत, असे आवाहन जिल्हा परिषद मुख्य कार्यकारी अधिकारी जितेंद्र डुडी यांनी केले आहे. या योजनेत प्रति लाभार्थी 1 लाख 20 हजार रूपये लाभाचे स्वरूप असून अर्जदाराने पंचायत समिती स्तरावर विहीत नमुन्यात अर्ज करणे आवश्यक आहे. पंचायत समिती स्तरावरून प्राप्त झालेल्या पात्र अर्जदारांच्या यादीमधून लाभार्थी निवड सोडत (लकी ड्रॉ) पध्दतीने करण्यात येणार आहे. योजनेचा लाभ घेण्यासाठी सक्षम प्राधिकाऱ्यांचा (तहसिलदार/ प्रांताधिकारी) जातीचा दाखला, सक्षम प्राधिकाऱ्यांचा (तहसिलदार) उत्पन्नाचा दाखला, ग्रामसेवक यांनी दिलेला संबंधित अर्जदाराचा रहिवासी दाखला अथवा स्वयंघोषणपत्र, यापूर्वी सदर योजनेचा वा अन्य शासकीय घरकुल योजनेचा लाभ घेतला नसल्याबाबतचा ग्रामसेवकाने दिलेला दाखला अथवा स्वयंघोषणापत्र, अर्जदाराच्या कुटुंबातील कुणीही व्यक्ती शासकीय व निमशासकीय नोकरीत नसल्याबाबत संबंधित ग्रामसेवकांचा दाखला अथवा स्वयंघोषणापत्र, अर्जराच्या स्वतः च्या नावे असणाऱ्या जागेचा ८ अ उतारा असेसमेंट लिस्ट नुसार-किमान क्षेत्रफळ २६९ चौ. फूट असावे ही कागदपत्रे आवश्यक आहेत. 00000