पुणे येथे "इंडस्टी मिट" 9 जूनला

सांगली दि. 5 (जि.मा.का) : कौशल्य केंद्र आपल्या दारी संकल्पनेतून पुणे विभागातील नामांकित इंडस्ट्रीज, इंडस्ट्री असोसिएशन, प्लेसमेंट एजन्सीज व मोठे लेबर कंत्राटदार इत्यादी समवेत सामंजस्य करार करण्याकरिता कौशल्य, रोजगार, उद्योजकता व नाविन्यता विभागामार्फत दि. 9 जून 2023 रोजी यशवंतराव चव्हाण विकास प्रबोधिनी बाणेर रोड पुणे येथे "इंडस्टी मिट" चे आयोजन करण्यात आले आहे. महाराष्ट्रातील बेरोजगार तरूणांना जास्तीत जास्त रोजगाराच्या संधी उपलब्ध करून देण्यासाठी तसेच इंडस्ट्रीजना आवश्यक कुशल मनुष्यबळ उपलब्ध होण्याकरीता नामांकित उद्योजक, इंडस्ट्री असोसिएशन, प्लेसमेंट एजन्सीज व मोठे लेबर कंत्राटदार यांनी कौशल्य रोजगार उद्योजकता व नाविन्यता विभागामार्फत आयोजित रोजगार मेळाव्यात त्यांच्याकडील रिक्तपदे उपलब्ध करून घ्यावी व बेरोजगार उमेदवारांना रोजगार उपलब्ध करून देण्याबाबत सहकार्य करावे, असे आवाहन जिल्हा कौशल्य रोजगार उद्योजकता मार्गदर्शन केंद्राचे सहायक आयुक्त ज.बा. करीम यांनी केले आहे. 00000